Nodiadau ar Arwain a Rheoli Gweithgareddau Blwyddyn 4

Rhagori

Nodiadau ar Arwain a Rheoli Gweithgareddau Blwyddyn 4 Nodiadau ar Arwain a Rheoli Gweithgareddau Blwyddyn 4

Bydd grŵp o ysgolion yn cytuno ar y cyllid cyffredinol i’r prosiect gyda phanel cydgysylltu’r consortiwm lleol.
Dylai’r grwp enwebu cynullydd a fydd yn galw cyfarfod cynnar ar gyfer cynrychiolwyr yr ysgolion sy’n cymryd rhan.
Dylai’r cynulliadd sicrhau bod yr holl ysgolion yn ymwybodol o’r canlynol:
- ni ddylid defnyddio unrhyw gyllid Rhagori y byddant yn ei dderbyn i gefnogi unrhyw weithgarwch craidd yn yr ysgol, ond yn hytrach ar gyfer gweithgarwch datblygu ar y cyd;
- bydd disgwyl iddynt gynnal archwilio neu ymchwil trylwyr ar y cyd;
- diben y gweithgarwch fydd datblygu adnodd er mwyn gwella’r cyd-destun y bydd carfannau o ddisgyblion dan anfantais cymdeithasol-economaidd yn dysgu ynddo yn y dyfodol;
- dylai’i gweithgarwch fod yn flaengar, gyda’r nod o greu cynnyrch a fydd hefyd o fudd i ymarferwyr y tu allan i’r grŵp o ysgolion.
Dylai’r grŵp gytuno ar y ffordd y bydd yn dyrannu’r cyllid sydd ar gael rhwng yr ysgolion. Wrth wneud hynny, dylai’r grŵp ystyried cyfraniad pob ysgol unigol. Efallai y bydd rhai ysgolion yn cyfrannu llai at y prosiect nag eraill; mae un ysgol yn debygol o arwain y fenter a/neu fod â gweithiwr allweddol.
Yr ysgol sy’n arwain fydd yn derbyn yr holl arian sydd ar gael ar gyfer y weithgaredd benodol. Dylai’r grŵp benderfynu ar sut bydd yr ysgol honno’n trosglwyddo’r arian grant i’r ysgolion eraill. Dylid hefyd cytuno ar system gyfrifyddu ar gyfer gwario’r arian grant.
Dylai’r grŵp benderfynu ar y staff ar gyfer y prosiect; er enghraifft, p’un ai’n amser llawn neu’n rhan amser, p’un ai drwy secondiad neu drwy benodiad tymor byr.
Dylai’r grŵp lunio cynllun gwario ar gyfer holl agweddau’r prosiect, gan gynnwys:
- staffio (fel yr uchod);
- gweithgareddau mewn ysgolion unigol;
- unrhyw gymorth neu wasanaethau y bydd y grwp am eu comisiynu gan asiantaethau eraill, gan gynnwys, os yw’n briodol, yr awdurdod lleol;
- gweithgarwch datblygu proffesiynol neu sefydliadol;
- monitro, gwerthuso neu adrodd ar y fenter;
- cynllunio grŵp neu amser paratoi;
- cyfarfodydd rhwng yr ysgolion neu gysylltiadau â mentrau eraill o fewn neu du allan i’r consortiwm;
- gweithgareddau lledaenu.
Dylai’r grŵp gytuno ar y manteision y disgwylir y bydd disgyblion sydd dan anfantais ar hyn o bryd yn eu cael o’r fenter (y canlyniadau) a’r ‘cynnyrch i’w gyhoeddi’ (yr allbynnau) yn sgil y fenter. Rhaid i’r ail o’r rhain gynnwys adroddiad gwerthuso trylwyr gan y grŵp ar weithgarwch y flwyddyn, gan ddangos gwersi ar gyfer y dyfodol. Dylai’r holl ysgolion fod yn fodlon cydweithredu’n gadarnhaol i gyfrannu deunydd at wefan ranbarthol Rhagori. Gallai’r allbynnau hefyd gynnwys deunydd hyfforddi, dogfennau arweiniad, adnoddau addysgu neu ddysgu, cyfeiriaduron o asiantaethau cefnogi, ac enghreifftiau o arfer da.
Dylai’r grŵp nodi’r asiantaethau allanol y bydd yn ceisio gweithio gyda nhw yn ystod y prosiect.
Wedi hynny, dylai’r grŵp ymgynghori â’r cydgysylltydd rhanbarthol a swyddog cyswllt Rhagori yr awdurdod lleol i gytuno ar y ffordd y caiff allbynnau’r prosiect eu rhoi at ei gilydd a’u cyflwyno. Lle bo’n bosibl, dylai grwpiau chwilio am gysylltiadau thematig gyda mentrau eraill a fyddai o fudd i’r ddwy ochr ac yn arwain at roi deunydd at ei gilydd ar y cyd.
Dros dymor yr haf 2009, dylai’r grŵp fod wedi trafod ei fenter i egluro’r trefniadau cyllid a mireinio’r cynllun prosiect y cytunwyd arno’n wreiddiol gyda grwp cydgysylltu’r consortiwm.
Os yw’r grŵp o’r farn bod angen dyrannu amser ac arian i gwblhau’r gwaith o lunio adroddiad y prosiect neu gynnyrch arall y fenter yn ystod tymor yr hydref 2010, dylid nodi hyn a chytuno arno gyda grwp cydgysylltu’r consortiwm cyn dechrau tymor yr hydref 2009.
Gall y grŵp ddyrannu cyllid i ‘secondio’, ‘cyflogi’ neu ‘brynu’ personél i ymgyrmryd ag unrhyw swyddogaethau gweinyddu, arwain, rheoli neu werthuso sy’n hanfodol i’r prosiect. Fodd bynnag, dylai’r grŵp hefyd ymchwilio i’r posibilrwydd o gysylltiadau â staff a myfyrwyr addysg uwch ôl-raddedig sydd efallai am wneud ymchwil sy’n gysylltiedig â’r prosiect Rhagori.